غزہ میں اسرائیلی مظالم کے خلاف کئی ملکوں میں احتجاج

روم : غزہ میں اسرائیلی مظالم کے خلاف کئی ملکوں میں احتجاج کیا گیا۔ لندن میں ریلی نکالی گئی جس میں فلسطینیوں کا قتلِ عام روکنے کا مطالبہ کیا گیا، اس موقع پر پولیس نے ساڑھے چار سو مظاہرین کو حراست میں لے لیا۔
فرانس کے دارالحکومت پیرس میں بھی ہزاروں افراد سڑکوں پر نکلے اور غزہ میں نسل کُشی بند کرنے کا مطالبہ کیا جبکہ اسپین کے شہر بارسلونا میں بھی دو لاکھ سے زائد افراد نے مارچ کیا اور اس موقع پر شرکاء نے اسرائیل کے خلاف اور فلسطین کی آزادی کے حق میں نعرے لگائے۔ اس موقع پر پولیس اور مظاہرین میں جھڑپیں ہوئیں پولیس نے آٹھ مظاہرین کو گرفتار کرلیا۔
ادھر اٹلی کے دارالحکومت روم میں چوتھے روز بھی غزہ کے لیے احتجاج ہوا جس میں اطالوی حکومت سے فلسطینیوں کی نسل کُشی رُکوانے کا مطالبہ کیا گیا۔ میکسیکو میں بھی طالب علموں نے اسرائیلی سفارتخانے کے سامنے خاموش احتجاج کیا جبکہ بھارتی ریاست تامل ناڈو میں بھی غزہ میں مظالم کے خلاف مظاہرہ کیا گیا۔ بنگلادیش اور یونان میں بھی غزہ کی حمایت میں مظاہرے کیے گئے جن میں لوگوں کی بڑی تعداد شریک ہوئی۔