فلسطینیوں کو مصر منتقل کردیا جائے، ٹرمپ کے داماد کی سازشی تجویز

واشنگٹن : سابق امریکی صدر ڈونلڈ ٹرمپ کے داماد جیرڈ کشنر نے سازشی تجویز پیش کی ہے کہ فلسطینی شہریوں کو مصر منتقل کر دیا جائے۔ غزہ کو حماس کے جنگجوؤں سے پاک کرنے کا یہ بہتر طریقہ ہے۔ انہوں نے کہا کہ اگر وہ اسرائیلی اہلکار ہوتے تو ان کی ترجیحات میں سے ایک یہ ہوتی کہ وہ سفارتی مذاکرات کے بعد جنوبی شہر رفح کے مکینوں کو مصر منتقل کرتے یا نقیب کے کسی علاقے کو بلڈوز کر تے تاکہ وہ وہاں آباد ہو سکیں۔ انہوں نے اس نکتے کو دہراتے ہوئے کہا کہ میرے خیال میں صحرائے نقیب کو کھولنا، وہاں ایک محفوظ زون بنانا، فلسطینی شہریوں کو منتقل کرنا درست قدم ہو گا۔ فلسطینیوں کی اپنی ریاست سے متعلق تجویز کو کوشنر نے ایک بہت برا خیال قرار دیا۔ انہوں نے اس یقین کا بھی اعادہ کیا کہ فلسطینی عوام کی زندگیوں میں تبھی بہتری آئے گی جب عالمی برادری ان کی قیادت کو جوابدہ ٹھہرانا شروع کرے گی۔