Raza Musani 
اسلام آباد : پاکستان 11 نومبر کو ہمسائیہ ملک افغانستان کی صورت حال پر تبادلہ خیال کے لیے امریکا، چین اور روسی سفارت کاروں کے مذاکرات کی میزبانی کرے گا۔ افغانستان پر ٹرائیکا پلس اجلاس میں چار ممالک سے نمائندگان خصوصی شرکت کریں گے۔ اس موقع پر چاروں ممالک کے نمائندگان خصوصی افغانستان کے عبوری وزیرخارجہ امیر خان متقی سے بھی ملاقات کریں گے جو 15 اگست کو طالبان کے قبضے کے بعد بدھ کو کسی بھی افغان وزیر کی جانب سے پہلے دورے پر پاکستان پہنچ رہے ہیں۔ ٹرائیکا پلس افغان حکام کے ساتھ رابطے کے لیے ایک اہم فورم کی حیثیت اختیار کرگیا ہے، یہ جامع حکومت، افغانستان میں انسانی بحران سے بچنے کے لیے طریقوں پر بات کرنے اور انسانی حقوق کی حفاظت خصوصاً خواتین کے حقوق کے تحفظ کے لیے اپنے تعاون کا اظہار کرے گا۔ اس سے قبل یہ اجلاس 11 اگست کو دوحہ میں ہوا تھا جہاں امریکا کے سابق نمائندہ خصوصی برائے افغانستان زلمے خلیل زاد نے شرکت کی تھی۔
