پاکستان، خطے میں امن کاوشوں میں شراکت داری کا خواہاں ہے, وزیرخارجہ

نیویارک : وزیر خارجہ مخدوم شاہ محمود قریشی نے کہا ہے کہ پاکستان، خطے میں امن کاوشوں میں شراکت داری کا خواہاں ہے اگر افغانستان میں صورتحال کشیدہ ہوتی ہے تو پاکستان سب سے زیادہ متاثر ہو گا، نیویارک میں میڈیاسے بات چیت اور انٹرویو میں وزیر خارجہ نے اہم علاقائی و عالمی امور پر پاکستان کے نقطہ نظر کی وضاحت کی اور افغانستان کی ابھرتی ہوئی صورتحال پر تبادلہ خیال کیا وزیرخارجہ نے کہاکہ افغانوں نے گذشتہ چار دہائیوں میں جنگ و جدل کا سامنا کیا ہے، اب افغانستان میں قیام امن کی امید پیدا ہوئی ہے عالمی برادری کو اس نازک موڑ پر افغانوں کو تنہا نہیں چھوڑنا چاہیے، پر امن افغانستان پورے خطے کیلئے منفعت کا باعث ہو گا، مخدوم شاہ محمود قریشی نے کہا کہ ہم گذشتہ چار دہائیوں سے اپنے محدود وسائل کے ساتھ، عالمی برادری کی مالی معاونت کے بغیر 30 لاکھ سے زیادہ افغان مہاجرین کی میزبانی کرتے آ رہے ہیں، ہماری معیشت مزید مہاجرین کا بوجھ اٹھانے کی متحمل نہیں ہو سکتی، انہوں نے کہاکہ پاکستان، دیگر ہمسایوں کی طرح افغانستان میں اجتماعیت کی حامل جامع حکومت کے قیام کا خواہاں ہے، ہم سمجھتے ہیں کہ افغانستان میں مفاہمت کا عمل اجتماعیت کی حامل حکومت کے قیام کے بغیر مکمل نہیں ہو سکتا.