Raza Musani 
کراچی : نواسہ رسول اورجگر گوشہ بتول حضرت امام حسین علیہ السلام اور ان کے رفقا کی اسلام کی سربلندی اور حق وصداقت کے لئے میدان کربلا میں دی گئی عظیم قربانی کی یاد میں دنیا بھر میں یوم عاشور مذہبی عقیدت و احترام سے منایا جارہا ہے۔ پاکستان سمیت دنیا کے مختلف ممالک میں ذوالجناح اور تعزیے کے جلوس برآمد ہورہے ہیں اور مجالس کا اہتمام کیا گیا ہے۔ جلوس عزا میں معروف ماتمی انجمنیں نوحہ خوانی و سینہ کوبی کرتے ہوئے سیدہ کو پرسا دینگے۔ مرکزی جلوس کے راستوں میں پانی اور دودھ کی سبیلیں لگائی گئی ہیں، جبکہ نیاز و تبرک بھی تقسیم کرنے کا انتظام کیا گیا ہے۔ کراچی میں یوم عاشور کا مرکزی جلوس نشترپارک سے برآمد ہوا مقررہ راستوں سے ہوتا ہوا امام بارگاہ حسینیہ ایرانیان کھارادر پر اختتام پذیر ہوگا۔ جلوس سے قبل مجلس سے علامہ شہنشاہ حسین نقوی نے خطاب کیا۔ لاہور میں مرکزی جلوس نثار حویلی سے برآمد ہوا۔ شبیہ ذوالجناح کا مرکزی جلوس روایتی راستوں سے ہوتا ہوا کربلا گامے شاہ پہنچ کر اختتام پذیر ہوگا۔ عراق کے شہر کربلا میں یوم عاشورہ پر لاکھوں افراد نے شرکت کی،شرکا نےحضرت امام حسین علیہ السلام اور ان کے ساتھیوں کی قربانی کو سلام پیش کیا۔ ایران کے مختلف شہروں میں بھی مرکزی جلوس میں عزاداروں کی بڑی تعداد شریک ہوئی۔لبنان اور یمن میں یوم عاشور مذہبی عقیدت و احترام سے منایا گیا۔ بڑی بڑی ریلیاں نکالی گئی۔ انگلینڈ اور امریکا میں بھی شہدائے کربلا کو خراج عقیدت پیش کیا گیا۔
