جوہری معاہدہ، ایران اور یورپی ممالک میں مذاکرات 29 نومبر سے بحال ہونگے

تہران : ایران اور مغربی ممالک کے درمیان ایٹمی پروگرام پر مذاکرات کا سلسلہ 29 نومبر سے بحال ہو گا۔ اس بات کا فیصلہ ایران کے نائب وزیر خارجہ علی باقری اور یورپی یونین کے رہنما اینریکی مورا کے درمیان ٹیلی فون پر بات چیت کے دوران کیا گیا۔ علی باقری کا کہنا تھا کہ ان مذاکرات میں ایران پر عائد غیر قانونی اور غیر انسانی پابندیاں اٹھانے پر بات چیت ہو گی۔ بائیڈن انتظامیہ نے تصدیق کی ہے کہ ایران کے لیے امریکا کے خصوصی مندوب راب مالے مذاکرات میں شریک ہوں گے۔ سابق امریکی صدر ڈونلڈ ٹرمپ نے مئی 2018 میں جے سی پی او اے سمجھوتے سے امریکا کو الگ کرکے ایران پر پابندیاں لگا دی تھیں۔