امداد کی تقسیم کی نئی تجویز غزہ پر اسرائیلی قبضہ مستحکم کرنے کا منصوبہ

تل ابیب : فلسطینیوں کیلئے کام کرنے والی ایک اسرائیلی این جی او گیشا نے بھی غزہ میں امداد کی تقسیم کے لیے امریکی حمایت یافتہ فاؤنڈیشن قائم کرنے کی تجویز کو غزہ پر اسرائیلی قبضہ مستحکم کرنے کا منصوبہ قرار دیا ہے۔ گیشا نے ایک بیان میں کہا کہ امداد کی تقسیم کیلئے فاؤنڈیشن غزہ سے آبادی کی جبری نقل مکانی کے لیے بنائی گئی ہے۔ یہ منصوبہ پٹی پر کنٹرول کو مستحکم کرنے اور آبادی اور انہیں ریلیف فراہم کرنے کی کوشش کرنے والے ہر فرد کا گلا گھونٹنے کے اقدامات کا اگلا قدم ہے۔ گیشا نے کہا کہ یہ منصوبہ انسانی ہمدردی کے اصولوں کو برقرار رکھنے میں بھی ناکام ہے اور غزہ کی پٹی پر اسرائیل کی مکمل ناکہ بندی کے تحت خوراک، پانی، ادویات اور دیگر اہم سامان تک رسائی کے لیے جدوجہد کرنے والے لاکھوں فلسطینیوں کی ضروریات کو پورا نہیں کرے گا۔ گروپ نے مزید کہا کہ امداد کی ترسیل کے لیے تنظیمی ڈھانچہ پہلے سے موجود ہے اور موثر ہے اسے جاری رکھنے کی اجازت دی جانی چاہیے۔