نیتن یاہو کی غزہ پالیسی ناقابل قبول اور شرمناک ہے، میکرون

پیرس : فرانس کے صدر ایمانوئل میکرون نے صیہونی وزیراعظم بنیامین نیتن یاہو کی غزہ پالیسی کو ناقابل قبول اور شرمناک قرار دیا۔ ٹی ایف ون ٹی وی کو انٹرویو میں ایمانوئل میکرون نے کہا کہ نیتن یاہو کی حکومت جو کر رہی ہے وہ ناقابل قبول ہے۔ غزہ میں نہ پانی ہے۔ نہ دوا ہے۔ زخمی باہر نہیں نکل سکتے، ڈاکٹر اندر نہیں جا سکتے۔ اسرائیل جو کچھ کر رہا ہے وہ شرمناک ہے۔ انہوں نےکہا کہ یورپی ممالک کو اسرائیل کے خلاف پابندیاں بڑھانے پر غور کرنا چاہیے۔ صرف واشنگٹن ہی اسرائیل پر فیصلہ کن دباؤ ڈال سکتا ہے۔ فرانسیسی صدر نے کہا کہ دنیا بھر سے آنیوالے امداد کو اسرائیل نے روک رکھا ہے۔ یہ ایک ناقابل قبول انسانی المیہ ہے۔ یہ کسی صدر پر منحصر نہیں ہے کہ وہ کسی واقعہ کو نسل کشی کہے یہ مورخین طے کریں گے۔