اسرائیلی جارحیت جاری رہی تو بڑی جنگ کا خطرہ ہے، لبنانی وزیراعظم

بیروت: لبنان کے نگران وزیراعظم نجیب میقاتی نے اسرائیلی جارحیت جاری رہنے پر بڑی جنگ سے خبردارکردیا۔ بیروت میں برطانوی وزیرخارجہ ڈیوڈ کیمرون سے ملاقات میں نجیب میقاتی نے کہاکہ اسرائیل جنوبی لبنان پر مسلسل اشتعال انگیز کارروائیاں کررہا ہے۔ جس سے صورتحال کبھی بھی بگڑ سکتی ہے اور خطہ بڑی جنگ کا شکار ہوسکتا ہے۔ لبنان کے نگراں وزیراعظم نے کہا جنگ کو ٹالنا غزہ میں جنگ بندی سے ممکن ہے۔ میقاتی نے کہاکہ غزہ میں جنگ کو روکنے کا گیٹ وے جنگ بندی سے شروع ہوتا ہے، پھر دو ریاستی فارمولے پر مبنی حل پر بات چیت اور فلسطینیوں کو ان کے حقوق دینے کی طرف بڑھتا ہے۔ ڈیوڈ کیمرون نے کہاکہ غزہ سے لے کر بحیرہ احمر تک کشیدگی خطے کو عدم استحکام سے دوچار کرے گی۔