Raza Musani 
لاہور: جامعہ بقیتہ اللہ کے پرنسپل مولانا تطہیر حسین زیدی نے کہا ہے کہ اگر ہم اپنے معمولات زندگی میں سے اللہ کو مائنس کریں گے تو خود بھی مائنس ہو جائیں گے، جامع علی مسجد جامعة المنتظر میں خطبہ جمعہ دیتے ہوئے مولانا تطہیر نے کہا کہ اگر ہم اللہ اور قرآن کی نہیں مانتے تو چلتی پھرتی لاشیں ہیں جن کے ہاتھ تاش کے پتے تو اٹھاتے ہیں مگر تلاوت کے لئے قرآن نہیں اٹھاتے، پیر سینما کی طرف توجاتے ہیں مگر مسجد نہیں جاتے یہ چلتی پھرتی لاشیں ہیں، ہمارا عقیدہ ، خوشی اور غم قرآن رسول (ص) اور معصومین(ع) کی تعلیمات کے تابع ہونی چاہیے، عزاداری کو اللہ اور اس کے رسول کے احکامات کے تابع بنایا جائے، اپنے مزاج کے مطابق نہیں، انسان کی زندگی فطرت پر استوار ہے جس میں خوشیاں ہیں اور غم بھی غم اور خوشی منانا بھی فطری تقاضا ہے، لیکن اگر یہ قرآن کی تابع نہیں ہے تو وبال جان بن جائے گا۔
