Raza Musani 
نیویارک : نیویارک، واشنگٹن اور شکاگو سمیت امریکہ بھر میں صدر ڈونلڈ ٹرمپ کی آمرانہ پالیسیوں کے خلاف لاکھوں امریکی سڑکوں پر نکل آئے۔ امریکا میں یہ مظاہرے نو کنگز کے عنوان سے کئے گئے جس میں ڈیموکریٹک رہنما بھی شریک ہوئے۔
سب سے بڑا احتجاج نیو یارک میں ہوا جہاں ٹائمز اسکوائر اور دیگر مقامات پر مظاہروں اور ریلیوں میں ایک لاکھ سے زائد افراد شریک ہوئے۔ ٹائمز اسکوائر میں ہزاروں افراد نے ڈیموکریسی ناٹ مونارکی اور دی کانسٹی ٹیوشن اِز ناٹ آپشنل جیسے نعرے بلند کیے۔ سینیٹ میں اقلیتی رہنما چَک شومر نے کہا کہ ہم امریکہ میں آمروں کو برداشت نہیں کریں گے۔
واشنگٹن ڈی سی میں سینیٹر برنی سینڈرز نے اپنے خطاب میں کہا کہ ہم یہاں امریکہ سے نفرت نہیں بلکہ اس سے محبت کے اظہار کے لیے آئے ہیں۔ مظاہرین کا کہنا ہے کہ یہی وقت ہے جب جمہوریت کے تحفظ کے لیے عوام کو آواز بلند کرنا ہوگی۔
رپورٹس کے مطابق کئی ریاستوں میں نیشنل گارڈ کو الرٹ رکھا گیا تھا۔ منتظمین کا کہنا ہے کہ تقریباً ستر لاکھ شرکاء کے باوجود مظاہرے پُرامن رہے۔
