سینیٹر علامہ ناصر عباس کی عراق میں اہم دینی و سیاسی شخصیات سے ملاقاتیں

بغداد : مجلس وحدت مسلمین کے سربراہ سینیٹر علامہ راجہ ناصر عباس اور سربراہ امور خارجہ ایم ڈبلیو ایم ڈاکٹر سید شفقت حسین شیرازی نے عراق میں مختلف اہم دینی و سیاسی شخصیات سے الگ الگ ملاقاتیں کی ہیں۔ انہوں نے آلِ حکیم کے چشم و چراغ علامہ سید عمار الحکیم سے بغداد میں ملاقات اور مختلف امور پر تبادلہ خیال کیا ہے۔ اس موقع پر انہوں نے عراق و پاکستان کے مابین برادرانہ تعلقات، پاکستانی زائرین کے مسائل و عراقی عوام کی جانب سے زائرین سید الشہداء علیہ السلام کے شاندار استقبال اور ہر طرح کی خدمات کی فراہمی و محبت و ایثار جیسے موضوعات پر عراقی عوام اور حکام کا شکریہ ادا کیا ہے۔ انہوں نے مجلسِ اعلیٰ اسلامى عراق کے سربراہ اور عراقی پارلیمنٹ کے سابق ڈپٹی اسپیکر علامہ ڈاکٹر شیخ ہمام حمودی۔ عراق میں نمائندہ مقام معظم رہبری آیت اللہ سید مجتبٰی حسینی سے بھی اہم ملاقات کی ہے۔
علامہ راجہ ناصر عباس نے عراق کے سابق وزیر اعظم ڈاکٹر عادل عبدالمہدی سے بھی ملاقات کی۔ ملاقات میں پاک عراق تعلقات میں مزید بہتری ، پاکستان سے عراق جانے والے زائرین کے ویزے۔ ائرپورٹس اور بارڈز کے مسائل کو حل کرنے کے حوالے سے گفتگو کی.