Raza Musani 
لکھنو: بھارتی صوبے اتر پردیش میں پولیس نے روہنگیا مسلمانوں کے خلاف بڑے پیمانے پر کریک ڈاؤن شروع کردیا۔ اترپردیش کے چھ اضلاع اور شہروں میں پولیس نے چھاپے مارے۔ اور سرحد پار کرنے اور غیرقانونی رہائش کے الزام میں چوہتر روہنگیا مسلمانوں کو گرفتار کرلیا۔ پولیس کے مطابق گرفتار ہونے والوں میں 55 مرد، 14 خواتین اور پانچ بچے شامل ہیں۔ گرفتار شدہ خواتین میں سے ایک حاملہ ہے۔ روہنگیا انسانی حقوق گروپ کا کہنا ہے کہ گرفتار روہنگیا مسلمان دس سال سے ان علاقوں میں رہ رہے تھے، محنت مشقت کرکے گزر بسر کر رہے تھے اور صرف پناہ کے طالب تھے۔ گروپ نے گرفتار افراد کی فوری رہائی کا مطالبہ کیا ہے۔ واضح رہے کہ میانمار کی فوج کے مظالم سے جان بچانے کے لیے2017 میں لاکھوں روہنگیا مسلمان فرار ہو کر بنگلہ دیش اور بھارت آگئے تھے۔
