فلسطینیوں کا قتل عام ہولوکاسٹ کے مترداف ہے، محمود عباس کے بیان پر اسرائیل اور جرمنی آگ بگولا

مقبوضہ بیت المقدس : فلسطینی صدر محمود عباس نے اسرائیلی حملوں میں فلسطینیوں کے قتل عام کو ہولوکاسٹ کے مترداف قرار دے دیا سچ بیان کرنے پر اسرائیل اور جرمنی آگ بگولا ہوگئے اور محمود عباس کے بیان کی مذمت کردی۔
برلن میں جرمن چانسلر اولاف شولز کیساتھ میڈیا سے گفتگو میں محمود عباس نے کہا تھا کہ اسرائیل 1947 سے لیکر اب تک فلسطینیوں کے خلاف 50 مرتبہ قتل عام اور ہولوکاسٹ کا مرتکب ہوچکا ہے۔ ہمارا مطالبہ امن کے سوا کچھ نہیں ہے، پلیز امن کیلئے آگے آئیں، سلامتی کیلئے آگے آئیں، آئیں مل کر اعتماد سازی کو بحال کرتے ہیں، اس موقع پر جرمن چانسلر محمود عباس کے ہولوکاسٹ سے متعلق بیان پر خاموش رہے تاہم بعد ازاں بڑے پیمانے پر تنقید کے بعد انہوں نے ایک ٹوئٹ میں کہا کہ محمود عباس کا بیان اشتعال انگیز ہے۔ہولوکاسٹ کی حقیقت کو کسی اور واقعے سے جوڑنا جرمن شہریوں کیلئے ناقابل قبول اور ناقابل برداشت ہے، میں ایسی کسی بھی کوشش کی مذمت کرتا ہوں جو ہولوکاسٹ کو تسلیم نہ کرتی ہو۔