Raza Musani 
بیروت: لبنان کے فلسطینی پناہ گزین کیمپ میں دو روز سے جاری جھڑپوں میں چھ افراد جانبحق اور سات زخمی ہو گئے۔ لبنان کے شہر سیدون میں واقع عین الحلوہ کیمپ فلسطینی صدر محمود عباس کے گروپ الفتح اور شدت پسند گروپ کے درمیان مسلح جھڑپوں کے بعد میدان جنگ بن گیا۔ دونوں گروپوں نے بھاری ہتھیاروں کا استعمال کیا۔ گھات لگا کر کیے گئے حملے میں فتح کا ایک کمانڈر اشرف العرومچی چار ساتھیوں سمیت جانبحق ہو گیا جبکہ اس کے سات ساتھی زخمی ہو گئے۔ جھڑپوں کا آغاز گذشتہ روز سخت گیر گروپ کے رہنما پر قاتلانہ حملے سے ہوا تھا جس میں ایک شخص جانبحق ہوگیا تھا۔ تازہ جھڑپوں میں اُنروا کے زیراہتمام دو اسکولوں کو نقصان پہنچا ہے۔ الفتح نے ایک بیان میں کیمپ پر حملے کو گھناؤنی اور بزدلانہ قرار دیتے ہوئے اس کی مذمت کی ہے جس کا مقصد فلسطینی کیمپوں کی سلامتی اور استحکام کو نقصان پہنچانا ہے۔
