سوڈان سے بڑے پیمانے پر غیر ملکیوں کے انخلاء کا عمل شروع

خرطوم: سوڈان سے بڑے پیمانے پر غیر ملکیوں کا انخلا شروع ہوگیا۔ کئی ممالک کے سفارتکار ائرلفٹ کرلئے گئے۔ سوڈان سے بارہ ممالک کے 150 سے زائد شہریوں اور سفارتکاروں کو سعودی بحریہ نے جدہ پہنچایا۔ ان افراد میں کویت، قطر، عرب امارات،مصر، تیونس، پاکستان اور ہندوستان کے شہری بھی شامل ہیں ادھر امریکی فوج نے سوڈان میں سفارتی آپریشن عارضی طور پر معطل کرکے اپنے سفارتی عملے کو نکال لیا ہے۔ صدر جوبائیڈن کے مطابق امریکی فوج نے دارالحکومت خرطوم سے سفارتی عملے اور ان کے اہلِ خانہ کے انخلاء کے لیے خصوصی آپریشن کیا ہے۔ فرانس نے بھی اپنا سفارتی عملہ نکال لیا ہے۔ امریکا، برطانیہ، فرانس اور چین اپنے شہریوں کو خرطوم ایئر پورٹ سے ایئر لفٹ کرنے کا منصوبہ بنارہے ہیں۔ کئی ممالک کے رہنماؤں نے سوڈانی آرمی چیف عبدالفتاح البرہان سے رابطہ کیا ہے اور اپنے سفارتی مشنز اور عام شہریوں کے محفوظ انخلاء اور سہولت کو یقینی بنانے کا کہا ہے۔ پیرا ملٹری فورس کا کہنا ہے کہ غیر ملکیوں کے انخلاء کے لیے تمام ایئر پورٹس عارضی طور پر کھولنے کو تیار ہیں۔