Raza Musani 
کراچی: کراچی کے گل پلازہ میں خوفناک آگ ایک المناک سانحہ بن گئی۔ عمارت سے اب تک چھبیس لاشیں نکالی جاچکی ہیں جبکہ خواتین اور بچوں سمیت چھیتر افراد تاحال لاپتہ ہیں۔
ریسکیو حکام کے مطابق گل پلازہ میں آگ پر تقریباً قابو پالیا گیا ہے اور کولنگ کا عمل جاری ہے جب کہ ریسکیو اہلکار لاپتا افراد کو بھی تلاش کررہے ہیں۔ ایم اے جناح روڈ پر واقع گل پلازہ میں آگ ہفتے کی رات 10 بجے کے قریب لگی، گراؤنڈ فلور پر لگی آگ دیکھتے ہی دیکھتے تیسری منزل تک جاپہنچی، خوفناک آتشزدگی سے عمارت کے کئی حصے گر گئے۔ چالیس گھنٹے بعد ریسکیو اہلکار عمارت میں داخل ہوئے لیکن امدادی کام انتہائی مہارت سے کیا جارہا ہے کیونکہ عمارت کا بیشتر حصہ مخدوش ہوگیا ہے اور اس کے کسی بھی وقت گرنے کا خدشہ ہے۔ جلی ہوئی دکانوں میں محدود پیمانے کا سرچ آپریشن کیا گیا ، اس دوران ایک بچے سمیت 3 افراد کے اعضا ملے جنہیں سول اسپتال ٹراما سینٹر منتقل کردیاگیا۔ چیف فائر آفیسر کے مطابق گل پلازہ میں آرٹیفیشل گملوں اور پھولوں کی دکان میں ہفتے کی شب 10 بج کر14 منٹ پرآگ لگی تھی جب کہ 10 بج کر 38 منٹ پرریسکیو 1122 کو آگ کی اطلاع دی گئی۔
