کراچی : شہید قاسم سلیمانی و شہدائے القدس کو خراج تحسین پیش کرنے کیلئے شہداء کانفرنس کا انعقاد

کراچی: قدس کے شھداء و مجاھدین کو خراج تحسین پیش کرنے کیلئے کراچی میں شہداء کانفرنس کا انعقاد کیا گیا۔ حاج قاسم سلیمانی، ابومہدی المہندس اور دیگر شہدائے القدس کی چوتھی برسی کے موقع پر ذاکرین امامیہ پاکستان کے توسط سے شہداء و مدافعین القدس کانفرنس کے عنوان سے المحسن ہال کراچی میں یادگار تقریب منعقد ہوئی۔ اس تقریب میں فلسطین اور القدس کےمجاہدین و شھداء سے عقیدت رکھنے والے افراد کی بڑی تعداد موجود تھی۔ کانفرنس میں موجود شیعہ اور سنی دانشوروں سمیت مذہبی و سیاسی قائدین نے شہید حاج قاسم سلیمانی کی خدمات کو خراج تحسین پیش کرتے ہوئے قدس کی آزادی کیلئے ان کی راہ پر گامزن رہنے کی تاکید کی۔
تقریب کے مہمان خصوصی، خانه فرہنگ ایران کراچی کے سربراہ ڈاکٹر سعید طالبی نیا نے عالمی دہشت گردی کے خلاف جنگ میں شہید مجاھدین کو خراج عقیدت پیش کیا اور فلسطین و القدس کو آزاد کرنے کلئے شہید سلیمانی کے اہداف کو جاری رکھنے پر زور دیا۔ انہوں نے طوفان الاقصیٰ آپریشن کو حماس کا دانش مندانہ اور مناسب اقدام قرار دیا۔ ان کے علاوہ کئی شعراء اور معروف منقبت خوانوں نے بھی شھداء کو منظوم خراج عقیدت پیش کیا۔
کانفرنس سے مولانا ناصر مہدوی، ڈاکٹر ثروت عسکری، جماعت اسلامی کے ڈاکٹر معراج الہدیٰ صدیقی، جمیعت علمائے پاکستان کے مولانا سید عقیل انجم قادری، مجلس وحدت مسلمین کے مولانا سید احمد اقبال رضوی ، آل پاکستان شیعہ ایکشن کمیٹی کے مولانا مرزا یوسف حسین، شیعہ علماء کونسل کے مرکزی رہنما مولانا ناظر عباس تقوی، مولانا سجاد حاتمی، علامہ فرقان حیدر عابدی، فلسطین فاؤنڈیشن کے ڈاکٹر صابر ابومریم، بیرسٹر سرفراز علی میتلو نے خطاب کیا۔