Raza Musani 
واشنگٹن : امریکی صدر جو بائیڈن نے اپنے مغربی اتحادیوں کو روس کے خلاف جنگ میں یوکرین کی مدد جاری رکھنے کی یقین دہانی کرادی۔ وائٹ ہاؤس کے مطابق صدر جو بائیڈن نے یورپی اتحادی ممالک کے ساتھ ٹیلی فونک کانفرنس کی جس میں یورپی ممالک کے علاوہ کینیڈا اور جاپان کے سربراہان بھی شامل تھے۔ وائٹ ہاؤس کے مطابق ٹیلی فون کال پر یوکرین کو ہتھیاروں کی فراہمی، اس کے فضائی دفاع کو مضبوط بنانے کے علاوہ سردیوں کا مقابلہ کرنے کے لیے توانائی کے بنیادی ڈھانچے کو بہتر بنانے پر بھی تبادلہ خیال کیا گیا۔ جوب ائیڈن نے کانگریس کی جانب سے یوکرین کے لیے عسکری امداد کی درخواست نظر انداز ہونے کے باوجود یوکرین کی مدد جاری رکھنے کی یقین دہانی کرائی۔ وائٹ ہاؤس کے مطابق تمام ممالک نے جوبائیڈن پر زور دیا کہ یوکرین کے لیے ان کی حمایت میں کوئی تبدیلی نہیں آئی اور کسی نے بھی امریکا کی کیف کے لیے امداد پر شکوک و شبہات کا اظہار نہیں کیا۔ تاہم بائیدن انتظامیہ نے کانگریس کو خبردار کیا ہے کہ یوکرین کے لیے امداد کی فراہمی میں خلل نہیں پیدا ہونا چاہیے تاکہ روسی صدر ولادیمیر پوتن کسی بھی قسم کی کوتاہی کو اپنے فائدے میں نہ استعمال کریں۔
