اسرائیلی حملے، شام کا اقوام متحدہ سے نوٹس لینے کا مطالبہ

دمشق: شام کی وزارت خارجہ نے اقوام متحدہ اور سلامتی کونسل کے نام اپنے مراسلوں میں شام پر صیہونی جارحیت کی ذمہ داری قبول کرنے کا مطالبہ کیا ہے۔ وزارت خارجہ نے اقوام متحدہ کے سیکریٹری جنرل اور سلامتی کونسل کے چیئرمین کے نام مراسلوں میں شامی سرزمین پر ایران کے فوجی مشیر جنرل سید رضی موسوی پر دہشت گردانہ حملے کی طرف اشارہ کرتے ہوئے سرزمین شام پر صیہونی جارحیت بند کروانے کے لئے فوری طور پر موثر اقدام کی ضرورت پر زور دیا۔ مراسلوں میں کہا گیا ہے کہ یہ حملہ نہ صرف دہشت گردانہ بلکہ ویانا کنونشن کی کھلی خلاف ورزی بھی شمار ہوتا ہے۔ صیہونی حکومت شام کے اقتدار اعلیٰ کو جارحیت کا نشانہ بنا کر علاقے میں اپنی جارحیت کا دائرہ پھیلانے کی کوشش کر رہی ہے تاکہ فلسطینیوں کے خلاف جنگی جرائم اور ان کی نسل کشی کی پردہ پوشی کی جا سکے۔