اسرائیل راہداریاں کھول دے قیدیوں تک امداد پہنچا دیں گے، حماس

غزہ : حماس کے عسکری ونگ القسام بریگیڈز نے کہاہے کہ اسرائیل راہداریاں کھولے دے تو اس کی امداد یرغمالیوں تک پہنچادیں گے۔ القسام بریگیڈ کے ترجمان نے کہا کہ القسام بریگیڈز قیدیوں کو دانستہ طور پر بھوکا رکھنے کی پالیسی نہیں اپناتی۔ یہ قیدی بھی وہی کھاتے ہیں جو ہم کھاتے ہیں۔ بیان میں کہا گیاہےکہ تنظیم اس بات کے لیے تیار ہے کہ وہ ریڈ کراس کی امداد غزہ میں موجود قیدیوں تک پہنچا دے، بشرطیکہ اسرائیل مستقل طور پر انسانی راہداریاں کھول دے اور قیدیوں کو امدادی پیکج پہنچاتے وقت ہر قسم کی فضائی پروازیں بند کر دے۔
ادھر القسام بریگیڈز نے عربی، عبرانی اور انگریزی میں ایک وڈیو جاری کی ہے، جس میں اسرائیلی قیدی کو انتہائی لاغر حالت میں دکھایا گیا ہے، جس کے جسم کی ہڈیاں نمایاں ہو چکی ہیں اور یہ حالت مبینہ طور پر خوراک کی کمی کے باعث ہوئی ہے۔
ادھر اسرائیلی وزیر اعظم بن یامین نیتن یاہو نے بتایا ہے کہ انھوں نے اسرائیل اور مقبوضہ علاقوں میں ریڈ کراس مشن کے سربراہ جولیان لیریسون سے بات کی ہے اور ان سے درخواست کی ہے کہ وہ غزہ میں قیدیوں کو خوراک اور طبی امداد فراہم کرنے میں شرکت کریں۔