Raza Musani 
مقبوضہ بیت المقدس: صیہونی حکومت نے توسیع پسندانہ پالیسی کے تحت فلسطینیوں کی اراضی پر غیر قانونی قبضے کا سلسلہ جاری رکھا ہوا ہے۔
صیہونی حکومت نے مقبوضہ مغربی کنارے کے ضلع بیت اللحم میں 3لاکھ 20 ہزار اسکوائر میٹر اراضی کو ضبط کرنے کا حکم دیا ہے۔ یہ اراضی صیہونی آبادکاروں کیلئے قائم غیر قانونی بستی میں توسیع کیلئے استعمال کی جائے گی۔ فوجی انتظامیہ نے فلسطینیوں کو بیت لحم میں الخضر، نہالین اور ارطاس کے علاقوں میں اراضی خالی کرنے کا حکم جاری کیا ہے۔ یہ حکم فیصلے کی تاریخ سے 30 دن کے اندر نافذ العمل ہوگا۔ ادھر صیہونی حکومت نے مقبوضہ یروشلم کے قصبے حزمہ میں بھی سینکڑوں اسکوائر فٹ اراضی پر قبضے کیلئے نوٹس تقسیم کئے ہیں۔ نوٹس کے مطابق مذکورہ اراضی صیہونی آبادکاروں کے زیر استعمال سڑک کی توسیع کیلئے استعمال کی جائے گی۔
