اسرائیل امداد کی ترسیل میں رکاوٹیں ڈال رہا ہے، غزہ میڈیا آفس

غزہ : غزہ کے سرکاری میڈیا دفتر نے کہا ہے کہ جنگ بندی کے باوجود اسرائیل امداد کی ترسیل میں رکاوٹیں ڈال رہا ہے۔ یہ رویہ انسانی بلیک میلنگ کے مترادف ہے۔ غزہ کی انتظامیہ کا کہنا ہے کہ دس اکتوبر کو جنگ بندی کے آغاز کے بعد اب تک صرف 986 امدادی ٹرک محصور علاقے میں داخل ہوئے ہیں۔ حالانکہ پیر کی شام تک چھ ہزار چھ سو ٹرک پہنچنے تھے۔ بیان میں کہا گیا کہ طے شدہ تعداد چھ سو کے بجائے صرف نواسی ٹرک غزہ میں داخل ہو رہے ہیں۔ جو اسرائیلی قبضے کی طرف سے جاری گلا گھونٹنے، بھوک اور انسانی بلیک میلنگ کی پالیسی کو ظاہر کرتا ہے۔
حکام کے مطابق امداد کی محدود مقدار کم از کم انسانی ضروریات کو بھی پورا نہیں کرتی۔ دفتر نے زور دیا کہ غزہ کو روزانہ کم از کم 600 ٹرکوں کی باقاعدہ اور ہنگامی بنیادوں پر ضرورت ہے جن میں خوراک، ادویات، امدادی سامان، ایندھن اور گیس شامل ہوں تاکہ شہری زندگی کا بنیادی تسلسل برقرار رہ سکے۔