اسرائیل تمام انسانیت کے لیے خطرہ ہے، حزب اللہ

بیروت : حزب اللہ کے ڈپٹی سیکریٹری جنرل شیخ نعیم قاسم نے اس بات پر زور دیا ہے کہ صیہونی حکومت پوری انسانیت کے لیے خطرہ ہے جب تک قومیں آزادی کے کلچر پر کاربند رہیں گی ان پر کوئی غلبہ حاصل نہیں کر سکتا۔ انہوں نے پورے خطے کو غاصبوں سے آزاد کرانے کی ضرورت پر زور دیتے ہوئے کہا کہ اسرائیل ایک ناسور اور ایک بہت بڑا بوجھ اور خطرہ ہے۔
ان کا کہنا تھا کہ اسرائیل نہ صرف کرہ ارض کے لیے بلکہ پوری انسانیت، مذہب، دین اور مستقبل کے لئے سنجیدہ خطرہ ہے۔
شیخ نعیم قاسم نے مزید کہا کہ اسرائیل مغرب کی ایک چھوٹی سی تصویر ہے جہاں امریکا اور مغرب کی تاریخ استعمار اور قوموں کی لوٹ مار سے بھری پڑی ہے اور اسرائیل بھی قوموں کی زمینوں، دولتوں اور مفادات کو لوٹتا ہے۔ انہوں نے امریکہ اور مغرب اور ان کے اتحادیوں کی طرف سے ملکوں میں اخلاقی انتشار پھیلانے کے مکروہ اقدامات کی طرف اشارہ کیا اور تاکید کی کہ آج خاندان کو تباہ کرنے کے لیے ایک بڑا حملہ کیا جا رہا ہے اور دشمن اس طرح ہم پر غلبہ حاصل کرنا چاہتا ہے لیکن اگر ہمارے پاس ایک مربوط اور محفوظ خاندان اور بچے ہیں جو وقار اور ہمت کے ساتھ پروان چڑھے ہیں اور اپنی سرزمین کی آزادی کا کلچر ان میں موجود ہو تو روئے زمین پر کوئی بھی ایسی قوم کو شکست نہیں دے سکتا۔