Raza Musani 
بغداد :عراق کے وزیراعظم مصطفی الکاظمی نے تمام سیاسی جماعتوں سے اپیل کی ہے کہ وہ فوری طور پر حکومت تشکیل دینے کیلئے بھرپور کوشش کریں۔کابینہ کے اجلاس سے خطاب میں مصطفی الکاظمی نے کہا کہ ان کی حکومت نئی حکومت کی تشکیل تک اپنا مشن اور سرگرمیاں جاری رکھے گی اور اسی لئے عراق کی تمام سیاسی جماعتوں سے اپیل کی جاتی ہے کہ وہ فوری طور پر حکومت تشکیل دینے کی بھرپور کوشش کریں۔ عراقی مفادات کو سب پر فوقیت حاصل ہے اور اسی پالیسی پر ان کی حکومت نے عمل کیا ہے اور یہ پالیسی بدستور جاری رہے گی اور یہ کہ عراقی مفادات اور نیک نیتی کی بنیاد پر ہم اپنے شرکا کے ساتھ تعلقات کی بحالی کے خواہاں ہیں۔ وزیراعظم نے اپنے دورہ ریاض اور تہران کو نہایت خوشگوار قرار دیا اور کہا کہ انھوں نے دورہ ایران میں مشترکہ موضوعات اور توانائی اور آبی مسائل پر گفتگو کی اور ہمارے ایرانی بھائیوں نے توانائی کے اپنے وزیر کو دورہ عراق پر بھیجنے کا اعلان کیا ہے۔ مصطفی الکاظمی نے اسی طرح کہا کہ ان تعلقات اور توازان نے عراقیوں اور پوری دنیا پر ثابت کر دیا کہ عراق اپنی تاریخی بنیاد رکھتا ہے اور اس کا مقام و پوزیشن تعلقات کی تعمیرنو میں مدد فراہم کرے گی تاکہ علاقے میں استحکام پیدا ہو اور تمام ممالک جنگ یوکرین کے منفی اثرات مرتب ہونے کی روک تھام کر سکیں اور اس سلسلے میں باہمی تعاون کریں۔
