Raza Musani 
پیرس :چینی وزیرِ خارجہ وانگ ای کا کہنا ہے کہ ایران پر پیشگی حملوں کا کوئی قانونی جواز نہیں ہے۔ جنگ ایرانی جوہری مسئلے کا حل نہیں ہے۔
پیرس میں فرانسیسی وزیرِ خارجہ کے ساتھ مشترکہ پریس کانفرنس میں چینی وزیرِ خارجہ وانگ ای نے کہا کہ ایرانی جوہری مسئلے کا حقیقی حل مشرقِ وسطیٰ کے بنیادی مسئلے یعنی فلسطین کے مسئلے کو حل کیے بغیر ممکن نہیں ہے۔ انہوں نے کہا کہ امریکا نے خودمختار ملک ایران کی جوہری تنصیبات پر کُھلم کھلا حملہ کر کے ایک خطرناک مثال قائم کی۔ چینی وزیرِ خارجہ کا کہنا ہے کہ چین ایران کے جوہری ہتھیار تیار نہ کرنے کی ایرانی سپریم لیڈر کی یقین دہانی کی قدر کرتا ہے اور جوہری ہتھیاروں کے عدم پھیلاؤ کے معاہدے کے دستخط کنندہ ملک کی حیثیت سے ایران کے پُرامن جوہری توانائی کے حق کا احترام کرتا ہے۔
ان کا کہنا ہے کہ ایران جوہری پروگرام پر متعلقہ فریقین کو نئے بین الاقوامی معاہدے کی جلد از جلد بات چیت کرنی چاہیے تاکہ ایرانی جوہری سرگرمیوں کو مکمل طور پر بین الاقوامی جوہری توانائی ایجنسی کی سخت نگرانی اور تحفظ میں لایا جا سکے۔
