ایرانی وزیرخارجہ کی وزیراعظم اور آرمی چیف سے ملاقات

اسلام آباد : وزیراعظم شہباز شریف سے ایرانی وزیر خارجہ عباس عراقچی نے ملاقات کی، اس موقع پر وزیراعظم نے غزہ میں جنگ بندی اور انسانی امداد کی فراہمی پر زور دیا۔ شہباز شریف نے ایران پر اسرائیلی حملے کی مذمت کرتے ہوئے ایران کی خود مختاری اور علاقائی سالمیت کی حمایت کا اعادہ کیا۔ وزیراعظم نے ایرانی سپریم لیڈر آیت اللّٰہ خامنہ ای اور صدر مسعود پزشکیان کیلئے نیک خواہشات کا اظہار کرتے ہوئے پاک ایران برادرانہ تعلقات مزید مستحکم کرنے کے عزم کا اعادہ بھی کیا۔
ایرانی وزیرخارجہ سید عباس عراقچی نے آرمی چیف جنرل سید عاصم منیر سے بھی ملاقات کی۔ فوج کے بعض اعلیٰ حکام کے ساتھ ساتھ ایرانی سفیر رضا امیری مقدم اور پاکستان میں ایران کے ملٹری اتاشی جرنل محمد محسن شہابی بھی موجود تھے۔ عراقچی اور جنرل عاصم منیر نے پاک ایران دوطرفہ تعاون، خطے کی صورتحال بالخصوص دفاعی فوجی تعاون اور مشترکہ سرحدوں پر سیکیورٹی سے متعلق تازہ ترین پیش رفت پر تبادلہ خیال کیا۔