ایران، برطانیہ کا ایک دوسرے کے سفیروں کو طلب کرکے احتجاج

تہران: برطانیہ میں ایرانیوں کی گرفتاری پر برطانیہ اور ایران کے تعلقات کشیدہ ہوگئے ہیں اور دونوں نے ایک دوسرے کے سفیروں کو طلب کرکے احتجاج ریکارڈ کرایا ہے۔ ایرانی وزارت خارجہ نے تہران میں برطانوی ناظم الامور کو طلب کیا اور ایرانیوں کی گرفتاری کو غیر منصفانہ اور سیاسی قرار دیتے ہوئے احتجاج ریکارڈ کرایا. جس کے بعد برطانوی دفتر خارجہ نے لندن میں ایرانی سفیر کو طلب کرکے جواب دیا۔ ہوم سیکریٹری یوویٹ کوپر نے کہا کہ برطانیہ اپنی سرزمین پر ریاستی حمایت یافتہ خطرات کو برداشت نہیں کرے گا۔ انہوں نے کہا کہ وہ موجودہ قومی سلامتی ایکٹ کے اختیارات سے زیادہ طاقت قانون لائیں گی جو ہمیں غیر ملکی حمایت یافتہ تنظیموں کی سرگرمیوں اور کارروائیوں کو محدود کرنے کا اختیار دے گا۔ ادھر دفتر خارجہ نے کہا کہ قومی سلامتی کا تحفظ حکومت کی اولین ترجیح ہے اور ایران کو اس کے اقدامات کے لیے جوابدہ ہونا چاہیے۔