Raza Musani 
نجف : بزرگ مرجع آیت اللہ سیستانی نے سوئڈن میں قرآن پاک کی توہین کے حوالے سے اقوام متحدہ کے سیکریٹری جنرل انٹونیو گوتریس کو خط لکھ دیا انہوں نے لکھاکہ توہین آمیز اقدام کے لئے سوئیڈن کی حکومت کی طرف سے اجازت نامہ جاری کرنا نہایت شرمناک اور آزادی اظہار کی روح کے منافی عمل ہے۔انہوں نے لکھا کہ یہ توہین آمیز رویہ حالیہ برسوں میں مختلف ممالک میں ایک سے زیادہ مرتبہ پیش آچکا ہے، لیکن قابل توجہ بات یہ ہے کہ اس بار یہ سوئڈن کی پولیس کے رسمی اجازت نامے کے ساتھ اور اس کی موجودگی میں آزادی اظہار کے نام پر ہوا جب کہ یہ بات یقینی ہے کہ اظہار رائے کی آزادی کا احترام ایسے شرمناک عمل کو انجام دئے جانے کا جواز نہیں بنتا، جو دنیا کے دو ارب سے زائد مسلمانوں کے مقدسات پر کھلے عام حملے کی نمائندگی کرتا ہو، اور اس طرح انتہا پسندانہ خیالات اور غلط طریقوں کے رواج پانے کا باعث بنتا ہو۔ بزرگ مرجع نے واقعے کی مذمت کرتے ہوئے مطالبہ کیا کہ اقوام متحدہ مستقبل میں ایسے واقعات کی روک تھام کے لئے موثر اقدامات کرے اور ان ممالک پر ایسے واقعات کا سبب بننے والے قوانین پر نظر ثانی کے لئے دباؤ ڈالے۔ انہوں نے مختلف مذاہب کے پیروکاروں کے درمیان پرامن باہمی تعلقات، حقوق کی دیکھ بھال اور سب کے باہمی احترام پر مبنی فکری نقطہ نظر کی تاکید کی.
