ہندوستان اور امارات کا مقامی کرنسی میں تجارت پر اتفاق، ڈالر کو جھٹکا

ابوظہبی :ہندوستان اور متحدہ عرب امارات نے دوطرفہ تجارت مقامی کرنسی میں کرنے پر اتفاق کرلیا۔ ہندوستانی وزیراعظم نریندرمودی متحدہ عرب امارات کے دورہ پر ابوظہبی پہنچے جہاں ان کی امارت کے صدر شیخ محمد بن زید النہیان سمیت دیگر اعلیٰ حکام سے ملاقاتیں ہوئیں۔ اس موقع پر ہندوستان کے ریزرو بینک آف انڈیا اور عرب امارات کے مرکزی بینک نے مقامی کرنسیوں میں لین دین سے متعلق دو سمجھوتوں پردستخط کیے۔ اس اقدام سے امریکی ڈالر پر انحصار ختم ہوجائے گا۔ مشترکہ اعلامیہ میں کہا گیا ہے کہ سمجھوتے سے ہندوستانی روپے اور اماراتی درہم کی فارن ایکس چینج مارکیٹ کو ترقی دینے میں مدد ملے گی۔وزیراعظم نریندرمودی نےکہاکہ مقامی کرنسیوں میں تجارتی معاہدے سے دوطرفہ کاروبار اور سرمایہ کاری کو فروغ ملے گا۔ انہوں نے کہا کہ گزشتہ سال جامع اقتصادی شراکت داری کے معاہدے پر دستخط کے بعد سے دونوں ممالک کے درمیان تجارت میں 20 فیصد اضافہ ہوا ہے۔