اسکردو، سید علی رضوی اور کاظم میثم کے ہاتھوں اہم شاہراہ منصوبے کا افتتاح

اپوزیشن لیڈر جی بی اسمبلی کاظم میثم اور ایم ڈبلیو ایم کے صوبائی صدر سید علی رضوی نے اسکردو میں اہم شاہراہ کے منصوبے کا افتتاح کر دیا۔ ایم ڈبلیو ایم کے صوبائی صدر سید علی رضوی، اپوزیشن لیڈر کاظم میثم محکمہ تعمیرات عامہ کے ایکسیئن یاور عباس اور دیگر عمائدین نے فیتہ کاٹ کر منصوبے کا باقاعدہ افتتاح کیا اس موقع پر بڑی تعداد میں لوگ موجود تھے. یولتر ہائی وے پچیس سال قبل سابق رکن اسمبلی سید عباس رضوی کے دور حکومت میں بنا اس کے بعد سے اب تک اس اہم شاہراہ کے اوپر کسی نے بھی ایک اینٹ رکھنے کی زحمت نہ کی، روڈ کی عدم میٹلنگ کی وجہ سے بڑی مشکلات کا سامنا کرنا پڑ رہا تھا۔
علاقے کے منتخب نمائندے صوبائی اسمبلی میں قائد حزب اختلاف محمد کاظم میثم نے روڈ کو میٹل کرنے کا بیڑہ اٹھایا اور منصوبے کیلئے ساڑھے پندرہ کروڑ روپے مختص کئے۔ یولتر ہائی وے کی میٹلنگ سے جہاں یولتر کے عوام کو فائدہ ہوگا وہیں یہ اسکردو شہر کیلئے متبادل شاہراہ بھی ہوگی، شاہراہ بلتستان کسی وجہ سے بند ہونے کی صورت میں لوگ اسکردو شہر جانے کیلئے یولتر ہائی وے کا استعمال کر سکیں گے۔ اپوزیشن لیڈر کاظم میثم نے کہاکہ یولتر ہائی وے کی میٹلنگ سے اسکردو شہر کی خوبصورتی میں بڑا اضافہ ہوگا۔ علاقے میں تعمیر ترقی کی نئی راہیں کھلیں گی۔