کرم میں آپریشن، کوئی دہشتگرد گرفتار ہوا نہ ٹھکانے تباہ ہوئے

پاراچنار : لوئر کرم کے علاقے بگن اور مضافات میں شرپسندوں کے خلاف دکھاوے کا آپریشن تیسرے روز بھی جاری رہا۔ ضلعی انتظامیہ نے دعویٰ کیا ہے کہ بگن اور مضافات میں جاری کارروائیوں میں ہیلی کاپٹرز کا بھی استعمال کیا جارہا ہے اور بگن جانے والے راستوں پر پولیس اور سکیورٹی فورسز کے دستے تعینات ہیں۔ تین دن سے جاری آپریشن میں کوئی دہشت گرد ہلاک ہوا نہ ہی انکے ٹھکانے تباہ ہوئے۔ حکومت نے آپریشن متاثرین کیلئے کیمپ لگایا تھا لیکن وہ خالی پڑے ہیں۔ جس سے آپریشن کی حققیت کا اندازہ ہوتا ہے۔
ڈپٹی کمشنر ہنگو گوہر زمان وزیر نے تسلیم کیا ہے کہ کُرم سے ابھی تک کوئی متاثرین کیپموں میں نہیں آئے ہیں، ٹل انٹری پوائنٹ پر عملہ موجود اور تمام محکمے الرٹ ہیں۔ سکیورٹی فورسز کی جانب سے اسلحہ جمع کرانے کے اعلانات کیے جارہے ہیں اور کہا جا رہا ہے کہ مکین اپنا اسلحہ جمع کرادیں۔