صیہونی جرائم جاری رہے تو مزاحمتی قوتوں کو کوئی نہیں روک سکے گا، ولی امر مسلمین

تہران: ولی امر مسلمین آیت اللہ سید علی خامنہ ای نے امریکا اور یورپ کو خبردار کیاہےکہ اگر اسرائیل غزہ میں جرائم کرتا رہا تو مسلمانوں اور مزاحمتی قوتوں کو کوئی نہیں روک سکے گا۔ اسکالرز اور دانشوروں سے خطاب میں آپ نے کہاکہ مسلمان اقوام غصے میں ہیں۔ غیض و غضب کی حالت میں ہیں جس کے آثار ناصرف اسلامی ممالک بلکہ غیر اسلامی ممالک میں واضح طور پر عیاں ہیں۔ انہوں نے کہاکہ اگر غزہ پر صیہونی مظالم جاری رہے جس کی وجہ سے دنیا بھر کے مسلمان بے قرار ہوتے جارہے ہیں اور جہادی مقاومت کے گروہ بھی بے تاب ہوتے جارہے ہیں سب یہ بات اچھی طرح سمجھ لیں کہ پھر ایسی صورتحال میں کوئی بھی اُنہیں روک نہیں پائے گا۔ پھر یہ توقع نہ رکھی جائے کہ فلاں مقاومتی گروپ فلاں کام نہ کرے جب بے تابی انتہاء کو پہنچ جائے تو پھر کوئی بھی کسی کو روک نہیں سکتا اور یہ وہ حقیقت ہے جو آج موجود ہے۔ البتہ غاصب صیہونی رژیم اب کچھ بھی کرلے لیکن اپنی ذلت آمیز شکست کو مٹا نہیں سکتی۔ انہوں نےکہاکہ فلسطین میں جو کچھ ہو رہا ہے پوری دنیا کی نظروں کے سامنے ہے اور وہ اسرائیلی حکومت کا نسل کشی کا جرم ہے۔ انہوں نے کہا کہ بعض ممالک کے حکومتی عہدیداروں نے ایرانی عہدیداروں سے بات چیت کرتے ہوئے غاصب صیہونی رژیم کے دفاع میں اعتراض کیاکہ فلسطینی عام شہریوں کو کیوں قتل کررہے ہیں پہلی بات تو یہ حقیقت کے برخلاف ہے کیونکہ مقبوضہ فلسطین میں رہنے والے عام شہری نہیں ہیں بلکہ سب کے سب مسلح ہیں۔ اگر فرض بھی کرلیں کہ وہ عام شہری ہیں تو کتنے عام شہری قتل ہوئے ؟ جبکہ فلسطین میں شہید ہونے والے عام شہری ہیں چاہے وہ بوڑھے ہوں یا جوان بچے ہوں یا عورتیں اُنکی تعداد ہزار فیصد زیادہ ہے اور وہ سو فیصد عام شہری ہیں غزہ کی رہائشی عمارتیں مجاہدین کی قیام گاہیں نہیں ہیں مجاہدین اپنے مخصوص مقامات پر ہیں جس کا صیہونیوں کوبھی اندازہ ہے۔ انہوں نے کہاکہ غاصب صیہونی غزہ شہر کی زیادہ آبادی والے علاقے کو باقاعدہ انتخاب کرکے بمباری کرتے ہیں۔ آج پوری دنیا کی آنکھوں کے سامنے غاصب صیہونی رژیم نسل کشی کا جرم انجام دے رہی ہے اور پوری دنیا اس جرم کو ہوتا دیکھ رہی ہے۔ انہوں نے کہاکہ امریکا غزہ پر صیہونی مظالم میں برابر کا شریک جرم ہے ہمارے پاس مصدقہ اطلاعات ہیں کہ گذشتہ ہفتے سے جاری صیہونی مظالم کا مکمل کنٹرول امریکیوں کے ہاتھ میں ہے یعنی وہ ہیں جو اس ظلم پر مبنی سیاست کی ڈوریں ہلا رہے ہیں لہذا امریکہ اس ظلم و جنایت میں برابر کا شریک ہے۔ انہوں نے کہاکہ فلسطین میں شروع ہونے والی تحریک جاری رہےگی اور فلسطینیوں کی مکمل فتح کا باعث بنے گی۔