امریکا صفر افزودگی پر اصرار کرتا رہا تو کوئی معاہدہ نہیں ہوگا، ایران

تہران: ایرانی وزیر خارجہ عباس عراقچی نے یورینیم کی افزودگی کو ملک کی سرخ لکیر قرار دیتے ہوئے خبردار کیا ہے کہ اگر امریکا صفر افزودگی پر اصرار کرتا رہا تو کوئی معاہدہ نہیں ہوگا۔ عباس عراقچی نےکہا کہ اگر صفر افزودگی کا مقصد یہ یقینی بنانا ہے کہ جوہری ہتھیارحاصل نہ کیے جائیں تو یہ مقصد حاصل کیا جا سکتا ہے کیونکہ ایران اصولی طور پر جوہری ہتھیاروں کی تلاش نہیں کر رہا ہے۔ایرانی وزیرخارجہ نے کہا کہ ایران نے کبھی بھی جوہری ہتھیار بنانے کی کوشش نہیں کی حالانکہ اس کے پاس ایسا کرنے کی تکنیکی صلاحیت موجود ہے۔ عراقچی نے ایران کی جوہری تنصیبات پر حملے کے بارے میں اسرائیل کی دھمکیوں کا حوالہ دیتے ہوئے کہا کہ ایران کسی بھی ممکنہ اسرائیلی حملے کا ذمہ دار امریکہ کو سمجھتا ہے۔ چاہے اس میں امریکی افواج ملوث ہوں یا نہ ہوں، کیونکہ اسرائیل امریکی رضامندی کے بغیر کبھی بھی ایران پر حملہ کرنے کی جرات نہیں کرے گا۔