کوئی ایڈونچر کیا تو انڈیا کو ہولناک جواب دیا جائے گا، پاک فوج

راولپنڈی : پاکستانی فوج کے شعبہ تعلقات عامہ (آئی ایس پی آر) نے انڈیا کو خبردار کیا ہے کہ اگر کوئی ایڈونچر کیا گیا تو اس کا ہولناک جواب دیا جائےگا۔ انڈیا کے وزیر دفاع راج ناتھ اور آرمی چیف اوپندر دویدی کے بیانات پر پاکستانی فوج نے شدید ردعمل ظاہر کیا ہے۔
آئی ایس پی آر نے اپنے اعلامیے میں کہا ہےکہ غیر ذمہ دارانہ بیانات جارحیت کے لیے من مانے بہانے گھڑنے کی ایک نئی کوشش کی نشاندہی کرتے ہیں۔ بیان میں کہاگیاہےکہ اگر جنگ کا نیا دور شروع ہوا تو پاکستان پیچھے نہیں رہے گا کسی ہچکچاہٹ یا روک ٹوک کے بغیر بھرپور جواب دیا جائے گا۔ جہاں تک پاکستان کو نقشے سے مٹانے کی بات ہے تو انڈیا کو معلوم ہونا چاہیے کہ اگر کبھی ایسی صورتِ حال پیش آئی تو یہ دوطرفہ ہوگا۔ آئی ایس پی آر نے کہا کہ جو لوگ ایک نیا معمول قائم کرنے کی کوشش کر رہے ہیں انہیں معلوم ہونا چاہیے کہ پاکستان نے ردعمل کا ایک نیا معمول قائم کر دیا ہے، جو تیز، فیصلہ کن اور تباہ کن ہوگا۔