حزب اللہ کی تیزی سے فوجی سرگرمیوں کی بحالی، اسرائیلی حکام کی نیندیں اڑگئیں

بیروت: اسرائیلی فوجی حکام نے وزیرِ اعظم نیتن یاہو کو خبردار کیا ہے کہ حزب اللہ جنوبی لبنان میں اپنی فوجی سرگرمیوں کو تیزی سے بحال کر رہی ہے۔ اسرائیلی میڈیا کے مطابق یہ انتباہ ایک خصوصی سیکیورٹی اجلاس میں دیا گیا جو نیتن یاہو نے شمالی سرحد کی صورتحال پر بڑھتی تشویش کے باعث بلایا تھا۔ انٹیلی جنس رپورٹس میں بتایا گیا کہ حزب اللہ نہ صرف فوجی ٹھکانے اور عمارتیں دوبارہ تعمیر کر رہی ہے بلکہ مقامی سطح پر نئی بھرتیاں بھی شروع کر چکی ہے۔ اسرائیلی ملٹری انٹیلی جنس نے پارلیمانی ذیلی کمیٹی کو بتایا کہ حزب اللہ کی بحالی توقع سے کہیں زیادہ تیزی سے ہو رہی ہے، جو اسرائیلی دفاعی اداروں کے لیے نئے آپریشنل چیلنجز پیدا کر رہی ہے۔ ذرائع کے مطابق اسرائیلی فوج لبنان میں فضائی حملوں اور ہدفی کارروائیوں میں اضافے کی تیاری کر رہی ہے تاکہ حزب اللہ کی صلاحیتوں کو کمزور کیا جا سکے۔ تاہم دفاعی حکام کا کہنا ہے کہ اسرائیل نئی جنگ نہیں چاہتا، لیکن کسی بھی غیر معمولی اقدام کے لیے مکمل طور پر تیار ہے۔