جنگ بندی تک کسی اسیر کو رہا نہیں کیا جائے گا، حماس

دوحہ: حماس کے ترجمان سمیع ابو زہری نے سات یا نو اسیروں کو رہا کرنے کی خبروں کی تردید کرتے ہوئےکہاہے کہ باقی اسرائیلی اسیران کو اس وقت تک رہا نہیں کیا جائے گا جب تک جنگ بند نہیں ہوتی۔ سمیع ابو زہری نے قطری چینل الجزیرہ سے گفتگو میں سی این این کی اس رپورٹ کو مسترد کردیا جس میں دعویٰ کیا گیا تھا کہ حماس دو ماہ کی جنگ بندی کے بدلے نو یرغمالیوں کو رہا کرنے کے لیے تیار ہے۔ انہوں نے کہا کہ حماس ایک ہی مرحلے میں تمام مغویوں کو رہا کرنے کے لیے تیار ہے، اس شرط پر کہ اسرائیل بین الاقوامی ضمانتوں کے ساتھ جنگ کے خاتمے پر راضی ہو۔ انہوں نے کہا کہ جب تک وہ غزہ کے خلاف اپنی جارحیت کو لامتناہی طور پر جاری رکھنے پر اصرار کرتا ہے ہم اسیروں کو حوالے نہیں کریں گے۔ انہوں نے اسرائیل پر الزام لگایا کہ وہ حماس پر دباؤ ڈالنے کے لیے جھوٹی رپورٹوں سے عوام کو الجھانے کی کوشش کر رہا ہے۔
اس سے پہلے حماس رہنما اسامہ حمدان نے کہا تھا کہ امریکی فوجی کی رہائی حماس کی طرف سے جنگ بندی کے قیام کو تیز کرنے کی ایک پہل تھی مگر ہمیں امریکہ کی وعدہ خلافی اور مایوسی کا سامنا کرنا پڑا۔