وقت اور مشینری دی جائے، لاشیں تلاش کرکے دے دیں گے، حماس

قاہرہ : حماس کے سینئر رہنما خلیل الحیا نے اعلان کیا ہے کہ وہ غزہ میں پندرہ قیدیوں کی لاشیں تلاش کر کے واپس کرنے کے لیے تیار ہیں بشرطیکہ انہیں تلاش و بازیابی کے لیے مناسب وقت اور بھاری مشینری تک رسائی دی جائے۔
قاہرہ نیوز چینل کو انٹرویو میں خلیل الحیا نے کہا کہ اسرائیل اور حماس کے درمیان غزہ جنگ بندی معاہدہ قائم رہے گا کیونکہ ہم چاہتے ہیں کہ معاہدہ برقرار رہے۔ ہم اس کی پاسداری کے لیے بہت پر عزم ہیں ۔ خلیل الحیا نے کہا کہ حماس یرغمالیوں کی لاشیں تلاش کرنے اور انھیں طے شدہ وقت کے اندر اندر اسرائیل کے حوالے کرنے کے لیے سنجیدہ ہے۔ انہوں نے کہا کہ وہ بھی چاہتے ہیں کہ یرغمالیوں کی لاشیں ان کے ورثا تک جلد از جلد پہنچا دی جائیں تاکہ ہمارے اپنوں کی لاشیں ہمارے حوالے کر دی جائیں اور ہم ان کی باعزت طریقے سے تدفین کر سکیں۔ خلیل الحیا کا کہنا تھا کہ انھیں لاشوں کی تلاش میں کافی مشکلات کا سامنا کرنا پڑ رہا ہے۔ کئی لاشیں ملبے تلے دبی ہوئی ہیں۔ انہیں نکالنے کے لیے وقت اور بھاری مشینری کی ضرورت ہے۔ انھوں نے امید ظاہر کی کہ جلد ہی یہ کام مکمل کر لیا جائے گا۔