غزہ کا ٹرانسپورٹ نظام مکمل تباہ، روز مرہ کی زندگی مفلوج

غزہ : غزہ میں جاری اسرائیلی نسلی کش جنگ نے محصور علاقے کے ٹرانسپورٹ نظام کو تباہ کر کے رکھ دیا ہے، جس سے عوام کی روزمرہ زندگی مفلوج ہو چکی ہے۔ عالمی بینک، یورپی یونین اور اقوام متحدہ کی مشترکہ رپورٹ کے مطابق غزہ کے ٹرانسپورٹ انفراسٹرکچر کو تقریباً ڈھائی ارب ڈالر کا نقصان پہنچا ہے۔ رپورٹ میں کہا گیا ہے کہ غزہ کے سڑکوں کے نیٹ ورک کا تقریباً اکیاسی فیصد حصہ تباہ یا شدید متاثر ہو چکا ہے۔ جس کے باعث کئی علاقے ایک دوسرے سے کٹ گئے ہیں اور بنیادی سفری سہولیات معطل ہو گئی ہیں۔ رپورٹ کے مطابق جنگ سے پہلے غزہ کی سڑکیں گاڑیوں، موٹر سائیکلوں، بسوں اور ٹیکسیوں سے بھری رہتی تھیں، مگر دو سال سے زائد مسلسل بمباری کے بعد یہ منظر نامہ مکمل طور پر بدل چکا ہے۔ ملبے کے بڑے ڈھیر اور خطرناک راستے کئی علاقوں میں موٹرائزڈ ٹرانسپورٹ کو نہایت مشکل بلکہ ناممکن بنا چکے ہیں۔