مسلسل بمباری کے بعد غزہ ناقابلِ رہائش ہو چکا ہے، اقوام متحدہ

جنیوا : اقوامِ متحدہ کے انسانی امدادی امور کے سربراہ مارٹن گریفتھس نے کہا ہے کہ اسرائیلی فورسز کی مسلسل بمباری کے بعد غزہ ناقابلِ رہائش ہو چکا ہے۔ اپنے ایک بیان میں مارٹن گریفتھس نے کہا کہ 7 اکتوبر 2023ء سے جاری خوفناک حملوں کے 3 ماہ بعد غزہ موت اور مایوسی کی جگہ بن گیا ہے۔ غزہ کے لوگوں کو روزانہ خطرات کا سامنا ہے جبکہ دنیا صرف دیکھ رہی ہے، عالمی برادری کو 20 لاکھ سے زیادہ لوگوں کی مدد کا ناممکن مشن درپیش ہے۔ مارٹن گریفتھس نے کہا ہے کہ ہم مسلسل جنگ کے فوری خاتمے کا مطالبہ کر رہے ہیں، آنے والی نسلیں ان 90 دنوں کے جہنم اور انسانیت کے بنیادی اصولوں پر ہونے والے حملوں کو کبھی نہیں بھولیں گے۔