غزہ معاہدہ کے بہت قریب ہیں جو وہاں امن لے آئے گا، ٹرمپ

امریکی صدر ڈونلڈ ٹرمپ نے دعویٰ کیا ہے کہ ہم مشرقِ وسطیٰ میں ایک ایسا معاہدہ کرنے کے بہت قریب ہیں جو وہاں امن لے آئے گا۔ وائٹ ہاؤس میں کینیڈین وزیراعظم مارک کارنی کے ساتھ گفتگومیں صدر ٹرمپ نے کہا کہ غزہ پرانتہائی سنجیدہ مذاکرات جاری ہیں، اور یہ صرف غزہ ہی نہیں بلکہ پورے مشرقِ وسطیٰ میں امن لانے کا موقع ہو سکتا ہے۔ ٹرمپ نے بتایا کہ ہر ملک نے ان کے بیس نکاتی غزہ منصوبے کی حمایت کی ہے، جس میں اسرائیلی قیدیوں کے بدلے فلسطینی قیدیوں کی رہائی، جنگ بندی، حماس کا غیر مسلح ہونا اور غزہ کی تعمیرِ نو شامل ہے۔ ٹرمپ نے کہا کہ امریکہ اپنی طاقت استعمال کرے گا تاکہ تمام فریق معاہدے کی مکمل پاسداری کریں۔