امریکا میں حملوں کے امکانات میں اضافہ، ایف بی آئی کا انتباہ

واشنگٹن : امریکی وفاقی تحقیقاتی ادارے ایف بی آئی نے ملک میں شدید حملوں کا خطرہ ظاہر کردیا۔ ایف بی آئی کے ڈائریکٹر کرسٹوفر ویرے نے کہا ہے کہ غزہ جنگ میں شدت کے بعد امریکا میں یہودیوں اور مسلمانوں پر حملوں کے خطرات بڑھ گئے ہیں۔ ویرے نے سینیٹ کمیٹی کو بتایا کہ ہم نے حماس اور اس کے اتحادیوں کے اقدامات کا جائزہ لیا ہے۔ امریکا میں حملوں کو اس طرح کا تحرک ملے گا جو داعش کے وقت میں بھی نہیں دیکھا گیا تھا۔ انہوں نے کہا کہ یہ لمحہ فکریہ ہے۔ ہم خطرناک دور سے گذر رہے ہیں ، یہ گھبرانے کا وقت نہیں ہے بلکہ چوکنا رہنے کا وقت ہے۔ ایف بی آئی چیف نےکہا کہ قانون نافذ کرنے والے ادارے اس امکان کو رد نہیں کر سکتے اور نہ ہی روک سکتے ہیں کہ حماس یا کوئی اور غیر ملکی دہشت گرد تنظیم موجودہ تنازع کا فائدہ اٹھا کر ہماری سرزمین پر حملے کر سکتی ہے۔