Raza Musani 
رام اللہ : فلسطین نے عالمی برادری سے آباد کاری میں ملوث صیہونی تنظیموں کو دہشت گرد قرار دینے کا مطالبہ کردیا۔ فلسطینی وزارت خارجہ نے ایک بیان میں قابض صیہونی فوج اور مسلح آباد کار ملیشیا کی فلسطینیوں کی املاک۔ مقدسات اور گاڑیوں کو جلانے کے گھناؤنے جرائم کی سخت ترین الفاظ میں مذمت کی ہے۔ بیان میں کہا گیا ہے کہ آباد کار ملیشیا اور اسرائیلی فوج کی طرف سے منظم انداز میں مغربی کنارے میں فلسطینیوں کی املاک۔ مقدسات اور گاڑیوں کو جلانے کے جرائم روز کا معمول بن چکے ہیں۔ وزارت خارجہ نے مزید کہا کہ حکومت فلسطین ان جرائم کو بین گویر اور سموٹریچ جیسے انتہا پسند اسرائیلی وزراء کی قیادت میں اشتعال انگیز مہم اور ہتھیار اٹھانے کی مسلسل اپیلوں کا عکاس سمجھتی ہے۔ اسرائیلی فوج کی کسی بھی جارحیت کے بعد صیہونی آباد کار فلسطینی شہریوں کو مزید کچلنے کے لیے مداخلت کرتے ہیں۔ ان کی املاک کو تباہ کرتے ہیں۔ بیان میں خبر دار کیا گیا ہے کہ اسرائیلی فوج کی وحشیانہ کارروائیاں اور آباد کاروں کے حملے غرب اردن میں انتقام کی آگ بھڑکا رہے ہیں جو کسی بھی وقت آتش فشاں بن کر پھٹ سکتے ہیں۔ فلسطینی وزارت خارجہ نے عالمی برادری سے مطالبہ کیا کہ وہ غرب اردن میں روزانہ کی بنیاد پر جاری اسرائیلی کارروائیوں اور آباد کاروں کے حملوں کا نوٹس لے اور آباد کاری میں ملوث مقامی اور بین الاقوامی تنظیموں کو دہشت گردی کی فہرست میں شامل کرے۔
