جامعتہ المنتظر میں دارالقرآن والحدیث ریسرچ سینٹر قائم کرنے کا فیصلہ

لاہور : وفاق المدارس الشیعہ پاکستان کے نائب صدر اور جامعتہ المنتظر کے ناظم اعلیٰ علامہ سید مرید حسین نقوی نے کہا ہے کہ مدارس دینیہ اسلام کے قلعے اور معاشرے کی اہم ضرورت ہیں۔ مدارس صدیوں سے اسلامی معاشرے کی دینی ضروریات کو پورا کر رہے ہیں ۔علوم قرآن و حدیت ، فقہ اسلامی اور عصری علوم آئندہ نسلوں تک منتقل کرنے کے لئے اسلامی تعلیمی ادارے اور منصوبے جاری ہیں ۔ علماءسے گفتگو میں علامہ مرید نقوی نے کہا کہ عظیم حوزہ علمیہ جامعہ المنتظرکو جدید تقاضوں کے مطابق ڈھالنے کیلئے ابتدائی کام مکمل ہوچکا ہے۔ بہت جلد شعبہ جات کا اضافہ کیا جائے گا اور اسے جدید تقاضوں کے مطابق ٹیکنالوجی سے ہم آہنگ کیا جارہا ہے۔ دارالقرآن والحدیث کے نام سے ریسرچ سینٹر قائم کرنے کا پروگرام تشکیل پا چکا ہے ۔ اس تحقیقی مرکز میں قرآن مجید کے مختلف موضوعات پر تحقیقات کی جائیں گی ۔ہماری کوشش ہوگی کہ مختلف قرآنی موضوعات پر ہر سال کم ازکم ایک کتاب شائع کروائی جائے۔جامعتہ المنتظر کے ناظم اعلیٰ نے کہا کہ قرآن مجید کے مختلف موضوعات میں اخلاقیات ،احکامات فقہی، حدود و تعزیرات، قصص انبیا علیہم السلام،اہل بیت اطہار اور صحابہ کرام کے تذکرے کے علاوہ بہت سے موضوعات ہیں جن پر تحقیقاتی کام کیا جائے گا، تاکہ امت اسلامی کی رہنمائی کا فریضہ سرانجام دیا جاسکے۔