پابندیوں کی بحالی کے بعد آئی اے ای اے سے تعاون بے معنی ہو گیا، عباس عراقچی

تہران : ایران کے وزیر خارجہ عباس عراقچی نے کہا ہے کہ مغربی ممالک کی جانب سے بین الاقوامی پابندیوں کی بحالی کے بعد اقوام متحدہ کے جوہری ادارے کے ساتھ تعاون اب بے معنی ہو گیا ہے۔ عباس عراقچی نے تہران میں غیر ملکی سفیروں سے گفتگو میں کہا کہ قاہرہ معاہدہ جو پچھلے ماہ ایران اور عالمی جوہری توانائی ایجنسی (آئی اے ای اے) کے درمیان طے پایا تھا اب لاگو نہیں رہا۔ یہ معاہدہ ایران کے جوہری تنصیبات پر اسرائیل اور امریکہ کے حملوں کے بعد معطل تعاون کی بحالی کیلئے بنایا گیا تھا۔ عراقچی کے مطابق یورپی ممالک نے اسنیپ بیک میکنزم فعال کرکے یعنی پابندیاں بحال کرکے اپنے مذاکراتی اثر و رسوخ کو خود ختم کر لیا ہے۔ جس سے مستقبل کے مذاکرات میں ان کا کردار بہت کم رہ جائے گا۔ انہوں نے کہا کہ ایران جلد ہی ایجنسی کے ساتھ اپنے تعاون سے متعلق حتمی فیصلہ اعلان کرے گا۔ تاہم انہوں نے اس بات پر زور دیا کہ سفارتکاری کے دروازے اب بھی کھلے ہیں۔