لاہور میں نہج البلاغہ کے جعلی نسخے پھیلانے کی سازش ناکام

لاہور : امیر المومنین حضرت علی علیہ السلام کے کلام نہج البلاغہ کے جعلی نسخے پھیلانے کی سازش ناکام بنادی گئی، بروقت نشاندہی پر لاہور میں نہج البلاغہ کے تحریف شدہ نسخے تلف کردئے گئے، تنظیم المکاتب لکھنو کے نام سے شائع کئے گئے تحریف شدہ نہج البلاغہ میں توہین رسالت(ص)، توہین اہل بیت(ع) اور توہین صحابہ کی گئی تھی، پبلشرز غلام علی اینڈ سنز کے ڈائریکٹر اسد نیاز نے سنگین غلطی پر معذرت کرلی اور یقین دہانی کرائی کہ آئندہ مزید نسخے چھاپنے سے گریز کیا جائے گا، مولانا امتیاز کاظمی نے تھانہ انار کلی میں جعلی نہج البلاغہ کا مقدمہ درج کرایا تھا، پبلشرز اور علمائے کرام کے ہمراہ نیوز کانفرنس میں مولانا امتیاز عباس کاظمی نے کہا کہ تحریف نہج البلاغہ کی اشاعت کا مقصد مسلمانوں میں فساد پیدا کرنا اور مکتب اہل بیت کو بدنام کرنا تھا، ہماری تحقیقاتی ٹیم نے بہت بڑی سازش کو بے نقاب کرکے فتنے کو دفن کر دیا ہے، پبلشر نے اپنی غلطی کو تسلیم کیا اور معافی طلب کی، ہمارا معاہدہ ہوچکا ہے، تعاون کے مشکور ہیں۔