تنازعات کے حل میں چین موثر کردار ادا کر سکتا ہے، ہسپانوی وزیر اعظم

میڈرڈ : ہسپانوی وزیر اعظم پیڈرو سانچیز نے چین کے دورے کے دوران کہا ہے کہ ایران اور دیگر تنازعات کے حل میں چین ہی واحد عالمی طاقت نظر آتی ہے جو مؤثر کردار ادا کر سکتی ہے۔ بیجنگ میں چینی صدر شی جن پنگ سے ملاقات کے بعد پریس کانفرنس کرتے ہوئے پیڈرو سانچیز نے کہا کہ ایران اور امریکا کے درمیان مذاکرات ناکام ہونے کے بعد سفارتی راستہ اختیار کرنا ناگزیر ہے۔ انہوں نے کہا کہ چین اس بحران کے خاتمے اور خطے میں استحکام و امن کے قیام کے لیے کلیدی کردار ادا کر سکتا ہے۔ ان کا کہنا تھا کہ جنگ کے تسلسل سے عالمی سطح پر عدم استحکام بڑھ رہا ہے، جس کے اثرات توانائی اور معیشت پر بھی پڑ رہے ہیں۔ سانچیز نے اس بات پر زور دیا کہ تمام فریقین کو کشیدگی کم کرنے اور مذاکرات کی طرف واپس آنا چاہیے۔ انہوں نے مزید کہا کہ عالمی طاقتوں کو مل کر ایسا حل تلاش کرنا ہوگا جو دیرپا امن کی ضمانت دے سکے۔