غزہ میں بچے مسلسل حملوں کے خطرے میں جی رہے ہیں، یونیسیف

جنیوا: اقوام متحدہ کے ادارے یونیسیف نے غزہ اور سوڈان میں بچوں کی بگڑتی انسانی صورتحال پر شدید تشویش کا اظہار کرتے ہوئے کہاہےکہ ہزاروں بچے انتہائی نازک اور جان لیوا حالات میں زندگی گزارنے پر مجبور ہیں۔ یونیسف نے کہا ہے کہ غزہ کی پٹی میں بچے مسلسل فضائی حملوں کے خطرے اور صحت، پانی و تعلیم کے نظام کی مکمل تباہی کا سامنا کر رہے ہیں۔ روزمرہ زندگی بچوں کے لیے محض زندہ رہنے کی جدوجہد بن چکی ہے۔ ادارے نے خبردار کیا کہ یہی صورتحال سوڈان میں بھی دیکھی جا رہی ہے، جہاں تشدد، بھوک اور بیماری بچوں کی جانیں نگل رہی ہیں۔ یونیسف کے مطابق بمباری، غذائی قلت اور امراض نے ایسے حالات پیدا کر دیے ہیں جو زندگی گذارنے کے قابل نہیں رہے۔ ادارے نے فوری طور پر جنگ بندی اور محفوظ انسانی راہداریوں کے قیام کا مطالبہ کرتے ہوئے کہا کہ زندگی بچانے والی امداد کی بروقت فراہمی ناگزیر ہے، ورنہ بہت دیر ہو جائے گی۔