Raza Musani 
نئی دہلی : بھارت میں قومی تحقیقاتی ادارے نے پاپولر فرنٹ کے 68 سابق رہنماؤں پر اسلامی حکومت قائم کرنے کی سازش کے الزام میں چارج شیٹ داخل کردی۔ قومی تحقیقاتی ادارے نے کیرالا اور تامل ناڈو میں چارج شیٹس فائل کی ہیں۔ پاپولر فرنٹ کے خلاف چارج شیٹس کی تعداد چار ہوگئی ہے۔ چارج شیٹس میں الزام لگایا گیاہے کہ مسلم کارکن دہشت گردانہ سرگرمیوں کو انجام دینے اور 2047 تک ہندوستان میں اسلامی حکمرانی قائم کرنے کی سازش کے لیے فنڈ اکٹھا کرنے میں ملوث تھے۔ اس سے پہلے 13مارچ کو جے پور اور دوسری چارج شیٹ 16 مارچ کو حیدرآباد میں داخل کی گئی تھی۔ جن رہنماؤں کیخلاف چارج شیٹ دائر کی گئی ہے ان میں کئی اہم رہنما بھی شامل ہیں۔ ممتاز فلاحی مسلم گروپ کو گزشتہ سال ستمبر میں وزارت داخلہ نے کالعدم قرار دے کر پابندی لگادی تھی۔ پابندی کے بعد ہندوستان بھر میں پاپولر فرنٹ کے سینکڑوں رہنماؤں اور کارکنوں کو گرفتار کیا گیا۔
