Raza Musani 
اسلام آباد: نائب وزیر اعظم اور وزیر خارجہ اسحاق ڈار نے کہاہے کہ جنگ بندی بارہ مئی تک ہوئی تھی جسے اٹھارہ مئی تک بڑھا دیا گیاہے۔ ہندوستان کے ساتھ جامع مذاکرات ہوں گے۔ اسحاق ڈار نے سینیٹ میں اظہار خیال کرتے ہوئے کہا کہ ہم نے کسی سے سیز فائر کی درخواست نہیں کی اور نہ ہی کسی نے ہم سے جنگ روکنے کا کہا۔ اسحاق ڈار نے کہا کہ دس مئی کو پہلے امریکی وزیر خارجہ مارکو روبیو اور پھر سعودی وزیرخارجہ کا فون آیا تھا۔ انہیں بتادیا تھا کہ ہندوستان جنگ بندی کیلئے تیار ہے تو ہم بھی تیار ہیں۔ انہوں نے کہا کہ اقوام متحدہ کے چارٹر کے مطابق اپنے دفاع کا حق استعمال کیا کیونکہ ملکی خودمختاری اور سالمیت کے خلاف اقدامات کسی صورت قبول نہیں کرسکتے۔
ادھر پاکستانی وزیراعظم شہبازشریف نے کامرہ ایئربیس کے دورہ کے موقع پر دعویٰ کیاکہ پاکستان نے ہندوستان کے پانچ نہیں چھ جہاز گرائے اور ڈرون بھی مارے۔ ہمارے شاہینوں نے 10 مئی کی شام کو تھانیدار کا بت پاش پاش کردیا ، کوئی اب رہتی دنیا تک اس طرح کے غرور اور گھمنڈ میں مبتلا نہیں ہوگا۔
